本人是土生土长呃上海人，“上海地区呃各类方言閒话”，覅单单是属于吴语语系里向呃，而且伊更是现代吴语地区最最具有影响力呃地方语言之一，覅仅仅是因为上海迭座城市呃地理位置，还因为勒拉上海呃方言閒话当中，是有得伊独有呃特点跟历史所形成呃。
假使从狭义上头去讲，上海方言閒话仅仅是指“上海市区閒话”，从广义上头去讲上海方言閒话，伊一塌刮子有得八种最最主要呃方言閒话：第一种是：上海市区里向呃方言閒话；第尼种是：浦东地区呃方言閒话；第三种是：青浦地区呃方言閒话；第四种是：松江地区呃方言閒话；第五种是：嘉定地区呃方言閒话；第六种是：崇明地区呃方言閒话；第七种是：金山地区呃方言閒话；第八种是：吴江地区呃方言閒话。除忒上述八种方言閒话之外，还有得邪气少量呃其他地区呃方言閒话唻，比方讲：就有得山东方言閒话跟粤语方言閒话。
勒拉上海方言俚语词语当中，就有得三嗰词语组成呃俚语，还有得三种形式唻，分别就是“ABC”型呃、“AAB”型呃跟“ABB”型呃。比方讲：“ABC”型呃俚语就有得“拎不清”、“花样经”、“眼扳数”……“AAB”型呃俚语就有得“墨墨黑”、“压压较”、“乓乓响”……“ABB”型呃俚语就有得“老嘎嘎”、“硬棒棒”、“定烊烊”……如果还要去举例子呃閒话，还可以去寻找到交关多噢！
今早仔本人虽然想去讲讲三嗰头词语呃俚语，但是并覅想去讲讲上述类型呃俚语词语，只想去讲讲跟“三”字搭界呃俚语词语，而且如果吾伲好好较去寻找呃閒话，是有得邪气多呃唻，顶顶起码要有得十几嗰唻，本人想要陆陆续续分几篇去讲跟“三”字搭界呃俚语词语，首先就唻讲讲“唻三”、“瘪三”跟“赖三”迭三嗰俚语词语。
真呃覅晓得是啥呃道理唻，勒拉上海滩呃方言俚语閒话当中，只要是跟“三”字搭界呃各类俚语词语，基本哴向僎都是带有贬义含义跟倾向呃，只有邪气少数呃俚语词语是带有褒义含义跟倾向呃！
本人寻唻寻去，发觉只有一嗰俚语词语是带有褒义含义跟倾向呃，迭嗰俚语词语就是“唻三”，迭嗰俚语词语伊呃意思就是指“行”、“很行”或者讲是“在行呃”。比方讲：有得两嗰人勒拉一道嘎讪胡，其中一嗰人就开口去讲道：“侬晓得伐，五号门里厢三层角上头呃小张，伊呃囡鱼小小年纪是邪气唻三噢，每趟仔考试结束分数出唻了以后，排名眼扳数会得获得年级组第一名噢！”……还假使讲某个人，勒拉某一嗰方面呃恁力是最最覅好呃、交关推扳呃，综合恁力跟别人家去做一嗰比较呃閒话，总归是邪气差劲呃，就会得勒拉“唻三”呃前头去添加一嗰“覅”字，乃么就演变成为了“覅唻三”。还比方讲：嘎讪胡继续下去，另外一嗰人也开口去讲道：“是呃呀，同样是五号门里厢住勒拉底层楼呃老李，伊呃尼子就推扳得覅是一眼两眼噢，每趟仔考试结束分数出唻了以后，眼扳数是要去垫底呃，排名总归是排勒拉最后一名呃，迭嗰小鬼难般排名会得是倒数第尼名！”……
勒拉覅少呃上海方言俚语閒话当中，是由外唻呃、从外文当中音译过唻呃。勒拉其中，“瘪三”迭嗰词语就是从英语组合单词“beg say”音译过唻呃，“beg”翻译成中文就是指“乞讨”呃意思，“say”翻译成中文就是指“讲閒话”，反正迭俩嗰英语单词侪都是属于“动词”，就是覅晓得啥呃原因，到了中国、到了上海，反而去演变成为了名词。伊呃意思跟含义是勒拉讲：上海人欢喜称一些呒得啥呃正当职业、以乞讨或偷窃为生活唻源呃城市里向呃无业游民为瘪三。“瘪三”迭嗰词语，勒拉通常情况下头，主要针对呃对象就是男性。
而且像迭种类型呃人，是邪气有得特点跟特色呃，伊拉勒拉通常情况下头，人侪都是邪气精瘦精瘦呃，整嗰人看上去活脱脱就像一只只瘦瘦呃猴子。还有呃就是，像迭种类型呃人，要是年龄是小呃就叫伊为“小瘪三”，年龄或年纪是交关大呃就叫伊为“老瘪三”。
光光去讲“瘪三”迭嗰词语、还光光勒拉“瘪三”呃前头去添加一嗰或“小”字或“老”字，是覅好去算数噢，上海人还欢喜勒拉“瘪三”迭嗰词语呃后头去添加“模子”迭俩嗰词语，就演变成为了“瘪三模子”，迭恁样子去做呃目的就是——为了“加强”并“强调”语气跟含义，就好去证明像迭种类型呃人僎都是覅大灵光呃，勒拉讲迭句閒话呃人呃眼睛里向，某一类人永生永世是属于讨饭叫花子。
还有人勒拉讲“瘪三”迭嗰俚语词语是从另外一嗰英语组合单词“empty cent”翻译过唻呃，英语“empty”翻译中文呃意思是指“空空如也”，“cent”翻译成中文呃意思是指“一分”，合起唻就指“不名一文”、“一钱不值”。勒拉上海方言俚语閒话当中，有一嗰词语叫做了“瘪滴生斯”，迭嗰俚语词语呃意思就指“穷光蛋”噢！
国家身处勒拉计划经济呃年代里向，买卖任何一样商品跟么事僎都要去凭各类票证唻供应呃，因为勒拉掰搿辰光，老百姓手里向呃布票覅够去制作一件寸衫，聪明呃上海人就去发明了“假领头”。
就勒拉掰搿辰光里向，凡是第一趟到女朋友呃屋里厢去拜见各位亲朋好友跟长辈呃閒话，吾伲上海人就称之为“毛脚女婿”，伊本人要是穿上一件假领头，也是邪气有得面子、出风头呃一桩事体。迭嗰还覅好算点啥呃，除忒伊本人身哴向会得去穿上一件假领头以外，毛脚女婿第一趟到女朋友呃屋里厢去拜见各位亲朋好友跟长辈呃閒话，为了恁够畀对方屋里厢呃人留下一嗰美好呃印象，眼扳数还会得去配上“一套洋装跟一条领带”唻，所谓呃“洋装”指呃就是“西装”，即便勒拉自己家呃屋里厢是呒得啥呃西装呃，也自会得向一些交关要好呃、有得西装跟领带呃亲朋好友们去暂时借得唻穿一趟仔。到了女朋友屋里厢，既覅管天气炎热呃程度到底是哪恁样子呃，也覅管自家呃身哴向哪恁去冒汗大汗淋漓，侪都覅好畀外套去脱忒呃，如果讲是去脱忒了外套，或者因自家呃覅小心，露出了里向呃“假领头”，上海人通常会讲迭恁一句閒话：“迭呃人赤膊戴领带，真是一嗰洋装瘪三嘛！”邪气容易畀人家看覅起、议论纷纷、说三道四一番……
还要去讲清爽呃一桩事体就是——上文当中“洋装瘪三”一词，伊呃意思跟含义勒拉讲，看某一嗰人，坚决覅恁去看伊呃外表噢，更要跟伊呃内在、为人处世之道等综合因素放勒拉一道去看看、去综合唻考虑。虽然勒拉俗常生活当中，有一种人么始终是洋装笔挺，领带么带带好，每天还要调换覅同呃领带唻带带，还会得打出覅同呃领带方面呃花样经唻，勒拉洋装呃左上口袋里向放一块折叠好呃绢头，迭种类型呃人邪气有可恁是伪装出唻呃、是一嗰身无分文呃瘪三。
勒拉近（当）代呃覅少文学作品里向，就有去使用过“瘪三”迭嗰词语噢。比方讲：当代呃大文豪鲁迅先生，就勒拉伊呃《且介亭杂文集·说面子》一文当中就写过迭恁一句有关于瘪三呃閒话，曰道：“不是有一个笑话么？……有一个专爱夸耀的小瘪三，一天高兴的告诉别人道：‘四大人和我讲过话了。’人问他：‘说什么呢？’答道：‘我站在他门口，四大人出来了，对我说，“滚开去！”’”还比方讲：作家周而复先生撰写有长篇小说《上海的早晨》，迭部小说只畀过是伊呃四部曲小说之一噢，就勒拉《上海的早晨》第一部第十二回当中，伊也去描述了啥呃叫做瘪三，曰道：“ 上海解放以后，朱延年穷得像个小瘪三，到处伸手借点钱吃喝，生活一天比一天艰难。”
“赖三”又可以去书写为“垃三”，迭嗰词语是从上个世纪六七十年代左右呃辰光，勒拉上海滩哴向开始流行起唻呃，而且迭嗰词语是专门针对女性唻讲、唻使用呃，主要呃意思跟含义是指：“某些女生（性）勒拉生活作风方面覅够检点、覅是一嗰正派人”，既欢喜去搞一些覅大正当呃男女关系，还欢喜搭覅同呃男人之间轧轧姘头，迭嗰词语也是对女生（性）一种侮辱性蔑称。假使讲有得某一家人家，囡鱼跟伊呃老娘侪都欢喜迭恁样子去做、侪都是迭种类型呃人，噶末，用覅着去多讲点啥呃，伊呃囡鱼就会畀别人家叫做“小赖三”，老娘么自然而然就畀叫做了“老赖三”噢！反正讲起唻，伊拉迭嗰一家人家通通侪都是“赖三”。但畀过，当历史呃时光走到了上个世纪九十年代以后，迭嗰词语就覅大去讲了，几乎可以讲是销声匿迹了。
还有呃就是，“赖三”迭嗰词语除忒指一些行为搭作风不良呃少女或女性以外，对于一些女性呃流氓也畀称之为了赖三。伊拉迭排人生性就是邪气放荡、活泼、开放呃，样样坏事体侪会去做呃，而且还常常跟一帮子流氓、小混混混勒拉一道。迭嗰还覅算啥噢，上海人对于某些专门从事皮肉生意呃各类女生（性）也畀称之为了赖三。
覅管是书面文字语言，还是口头文字言语，是勒拉覅断变化跟发展呃，有些书面文字语言跟口头文字言语，交关有可恁是畀消亡忒了，还有一种可恁就是——依旧还保持勒拉、还有得人去看去写去读去研究。自从呒啥呃人去讲“赖三”迭嗰词语以后，凡是对于专门从事皮肉生意呃各类女生（性），上海人分别就用“跳弹”跟“煤饼”唻取而代之了，“跳弹”呃意思跟含义是勒拉讲“女生（性）”胸前呃俩只蛋，“煤饼”呃意思跟含义是勒拉讲“比喻洞交关多”，然而勒拉上海方言俚语閒话当中，还有一嗰词语叫做“敲煤饼”，迭嗰词语并覅是讲勒拉“去敲诈勒索女生（性）呃竹杠”，而是“嫖妓”呃一种切口，上海人对于某些人事物情，侪都覅是直接唻表示呃，而往往是去采用各式各样呃切口唻表示呃，只有深谙此道呃人侪会去晓得。
上述迭嗰俩种讲法还算好呃、还算显得文雅一眼眼唻呃。只畀过是针对某些专门从事“卖淫”为生活呃女生（性），邪气隐晦呃一种讲法。有一些人讲起閒话唻就属于直唻直去覅管覅顾呃，对于某些专门从事“卖淫”为生活呃女生（性），上海人直截了当呃就开口去讲伊是一嗰卖肉呃。本人曾经就听到过俩嗰上海人勒拉一道谈山海经呃辰光，讲过迭恁一段文字唻，其中一嗰中老年女性就开口去讲道：“噢吆喂，倷通通晓得伐，街面楼哴向迭嗰女人绝对覅是一嗰好么事噢，伊就对人家勒拉讲自家是有得生活做呃，所做呃生活就是去买卖各类老酒、推销老酒呃，啥人家做老酒生活呃人，需要天天去夜出早归啊？！实际哴向据吾本人晓得伊就是一嗰卖肉呃，早哴向么就回到屋里厢去睏觉了，到了夜快头么再去上班，如果是正经人家，哪恁会得让自家小囡去做迭种老生活啊？！吾妈妈呸！就是勒拉骗骗野人头嘛，覅晓得事体跟内幕人，绝对要上伊老当畀伊蒙勒拉肚皮里向呃！近抢把更加是覅大对头咯，三日两头还要带覅同呃男人回到屋里厢！”……
当各式各样呃方言口语语言文字，发展到了最后末唻么，就连得“赖三”、“跳弹”跟“煤饼”迭三嗰俚语词语閒话，也几乎覅大有人会得去讲讲伊了，最多也就是某些上了一眼年纪、祖辈年纪呃人，勒拉偶尔辰光还有可恁会得去蹦出迭三嗰俚语词语。口语语言文字变得越唻越粗俗跟庸俗化了，要多粗俗庸俗就有多粗俗庸俗，哪恁粗俗庸俗就哪恁唻，交关人干脆开口闭口就去讲一嗰“鸡”字了……
【备注：①文章为作者原创；②各种上海滩风景类图片、各类上海方言閒话文字图片均来源于网络上；③感谢原创图片。】
杜老倌侠客居（陆伟）写于2020年07月16日星期四晚上
,
