上海是一个移民城市，从1843年11月17号开埠格53万人口，后来到520万人，一直到现在2500万人，从一个小渔村到现在格世界大都市，为啥能够吸引八方俊才、四方商人呢？一定有其独特格原因吧，侬看上海地理位置得天独厚，勒了北纬30、40’～31、51’之间，三条各具特征鲜明格河浜，黄浦江黄、苏州河黑、长江混浊，最终侪汇入东海蓝，到海里去就是上海啦！由此形成了上海独特格水文化，上善若水啊！开埠一百多年当中，经历了快九代人、逐步形成了由吴语转化而成又具有上海特性格地方方言，上海闲话真格来之勿易啊！
搿只话题一开，就会想起交关勿算太老格上海老牌子，我非常欢喜脚踏车，侬当年假使有一部可以譬美“蓝翎”格永久牌13型、凤凰牌18型锰钢脚踏车，赛过侬现在有一部私家车，小姑娘就会抢着跟牢侬，扎台型啊！我搭太太买过一部天津飞鸽牌红颜色女式脚踏车，质量老灵格！听爷叔讲，13型、18型侪是天津钢厂生产格锰钢车架、钢圈，质量特别好。后来我迷恋上摩托车，就一直到江宁路淮安路，去兜二手摩托车市场，听听打桩模子嘴巴里格行情，倒也增长了勿少见识。上海牌手表17钻，外销21钻，后来又出一只海鸥牌，哦！现在海鸥陀飞轮老价钿啦！南京出了一只26元紫金山牌手表，完全可以骗骗女朋友哦，搿格辰光流行螺丝头，还呒么摩丝了，就用金钢钻发蜡，现在勒了周家嘴路通北路好像还有只三产门市部卖金刚鉆发蜡，美加净牙膏、护肤品、长命牌牙刷，友谊百雀灵，雅霜雪花膏，龙虎牌仁丹，中华牌万金油，蜂花牌香肥皂，固本汰衣皂，培罗蒙男式西装、朋街、新裳女装，博步男皮鞋，后来有牛头牌、远足牌，茂名路锦江饭店旁边的27元8角格高档皮鞋只能饱饱眼福，（后来我有幸买了一双765皮鞋），蓝棠、花牌女皮鞋，金陵路“鹤鸣”里厢有大不同鞋子、吕宋帽子，金陵东路大方照相馆、南京东路王开照相馆、自忠路红花照相馆、文庙路一飞照相馆、去看橱窗里明星照，1965年邻居买了一只上海牌582型照相机，稀奇格事体是伊居然会得拆拆装装，万航渡路五和针织二厂鹅牌汗衫马夹，菊花牌内衣，黄陂南路777号三枪牌棉毛衫裤，质量好得呒么闲话讲了，苏寿南是苏州人，专门赞助了一只“三枪杯”评弹节目，每日收听。古今牌胸罩，张小泉剪刀，民光牌、太平洋单被，全泰中老年服装，萃众414钟牌毛巾，海螺牌衬衫，春竹牌羊毛衫，凤凰牌提花毯，蜜蜂、蝴蝶牌缝纫机，三五牌台钟，回力牌球鞋，双钱牌套鞋，亚字牌电灯泡，老上海前三大银楼是杨庆和、方九霞、裘天宝，后六大银楼是凤祥、宝成、庆云、景福、费文元、庆福星，再后来就是老凤祥、裘天宝、城隍珠宝、老庙黄金了。想着触饥了，连云路新城隍庙朝北一眼，天冷去吃洪长兴涮羊肉，成都北路33号排队买新长发糖炒栗子，小绍兴里三黄鸡，光明中学隔壁弄堂里厢鲜得来排骨年糕，杏花楼月饼，老半斋双交面，乔家栅点心，老正兴本帮，大富贵安徽菜，功德林素斋，采芝斋麻酥糖，立丰牛肉干，凯司令掼奶油，徳大、红房子西菜、襄阳公园旁边的天鹅阁里香红浓汤…哦！太多了，写勿光。
上海、像一条永远流动格河川，上海人、勒了全世界侪有，而世界各国格人，侪会来到上海，流动格上海搭仔上海格流动，带来格一定是活力与新生，但是上海老牌子、上海闲话千万勿能让伊慢慢、慢慢流走，非但要保护好、还要让其发扬光大，听见过一方水土养一方人、侬听见过一方人养一方水土伐？听见过海纳百川、侬听见过百川纳海伐？朋友！侬会哪能想上海格《水土》
