假期喺屋企就最啱煲剧，
唔G大家有冇睇
近期播紧嘅《大步走》呢？
话说呢部由陈山聪姚子羚主演
嘅新剧开播咁耐，
收视一直都唔多掂水。
播咗咁耐都係得十几点嘅收视，
分分钟“荣登”今年嘅
最低收视剧集宝座...
其实今年大台已经出街嘅剧集
口碑同收视都麻麻地，
关注度係咁插水，
TVB嘅高层就梗係紧张啦！
所以即时决定搵
“收视福将”欧阳震华翻嚟救场！·
当然就唔係拍新戏啦！
讲紧嘅係上年已经拍好嘅
《伙记办大事》！
呢部云集两大视帝
欧阳震华、马德钟，
同埋女神万绮雯、陈滢嘅“新剧”，
一睇个阵容就知佢架势啦！
加上又係受众最多嘅查案剧，
绝对係台庆剧级别嘅制作！
虽然就冇摆喺台庆月出街，
不过好多网友都表示超期待！
睇嚟TVB想借Bobby
帮收视止血都唔係冇机会噶~
今次呢部《伙记办大事》
闻说就係之前口碑好好嘅
《铁马战车》续集，
同样係以交警做主题。
加上监制陈耀全呢几年嘅剧集，
好似《爱我请留言》、
《是咁的，法官阁下》
网上评分都好高。
特别係《爱我请留言》，
朱古力姐姐同波鞋爸爸
真係好甜啊！
加上剧情同对白都超warm，
所以而家仲有好多人会不停翻煲~
而欧阳震华今次喺剧中
就饰演IQ好高嘅欧阳sir，
专破离奇案件。
Wow~
专业人士呢啲角色
对于Bobby嚟讲简直易过借火啦！
↓
《壹号皇庭》
余在春
《陀枪师姐》
陈小生
《法证先锋》
高彦博
全部都係经典！
唔知今次欧阳sir
又会带啲咩惊喜畀我哋呢?
Bobby旧年
拍完呢部剧之后就宣布离巢，
《伙记办大事》亦成为佢嘅暂别作了。
而家嘅Bobby
重心就转移去咗内地，
上次可乐君亦都同大家讲过
欧阳震华主演嘅
内地网大《洗冤录》就嚟开播。
除此之外，
Bobby亦都开咗抖音账号，
绝对係与时并进噶~
难得Bobby出山拍剧，
搭档嘅女主角
当然要有翻咁上下分量啦！
所以今次就搵嚟
一段时间冇拍剧嘅
万绮雯蚊蚊拍住上啦！
继《东坡家事》之后，
万绮雯再次同Bobby合作，
已经默契十足嘅佢哋，
唔知今次又会有咩惊喜畀到观众呢？
蚊蚊唞咗几年之后再拍翻剧，
大家都好期待佢今次嘅表现，
点G佢拍完冇耐
又再宣布离巢。
睇嚟而家嘅蚊蚊比较
想enjoy生活多啲，
拍剧嘅嘢真係睇心情。
中意万绮雯嘅朋友，
真係唔好错过呢部暂别作了喂！
今次领衔主演嘅
仲有视帝马德钟，
饰演精英律师嘅佢
同bobby有连场交锋，
睇落戏味十足啵！
不过讲时讲，
马德钟呢几年嘅样
好似有啲唔同咗。
佢自己就表示
係减肥去得太尽导致嘅，
大家觉得呢?
呢几年同亲马神搭档嘅
都係女神级人马，
之前《跳跃生命线》就同张曦雯。
今次就有宅男女神陈滢，
听闻仲有激吻场口啵！
已经五张几嘢嘅马神
望落状态的确好fit下，
同陈滢谈情都唔算特别违和嘅~
话说陈滢
近年真係备受力捧，
新剧一部接一部，
啱出街嘅《爱美丽狂想曲》
都有佢份。
所以即係嚟紧4月
两线剧集都会见到佢嘅身影。
有份参演《伙记办大事》嘅
一众演员入面
仲有唔少好戏之人，
好似张国强、
马蹄露、杨卓娜等等！
呢个阵容嚟讲，
演技就绝对唔使担心啦！
至于剧情了喔，
大家睇下预告片
提前感受下先啦！
话说呢部戏喺旧年嘅“香港国际影展”
就已经作为重头剧嚟宣传，
拖足成年都未出街，
好彩嚟紧终于都开播，
再摆就变仓底货了，阴公！
嗱，
呢部阵容鼎盛嘅《伙记办大事》
4.12九点半就正式开播啦！
作为欧阳震华、万绮雯嘅暂别作，
大家会唔会嚟撑场啊？
资料来源：微博、豆瓣、剧照
互联网综合整理
*文中图片版权归原作者所有，如有问题，请与原作者联系
,
