自从黄子华金盆口之后，佢嘅精力主要集中喺电影同埋舞台剧上面。
原定今年春节佢主演嘅贺岁片《饭戏攻心》、以及舞台剧《最后礼物》，都因为疫情原因，搞到而家，都未有机会上映。
明明系贺岁片，但《饭戏攻心》最快都要9月食月饼嘅时候，先至可以上映。
不过迟到好过冇到，最紧要系「delay no more」。
否则，乜戏乜剧都上唔到，分分钟成为栋笃笑最新素材，令子华神复出开个「娱乐圈血肉史3」都仲得。
不过谂下好啦，呢几年黄子华嘅电影，已经唔再系票房毒药。
较早前嘅《栋笃特工》，之后嘅《乜代宗师》，票房同口碑都相当不错。
对于电影嘅热爱与执着，其实无论疫情定系乜Q，都肯定阻唔到子华神。
呢边旧戏都未上映，嗰边新戏已经开锣。
话说（5月23日）黄子华新戏《毒舌大状》就搞咗个开镜仪式。
一听戏名，就知啱晒黄子华。
终于终于，子华神终于从师爷升到律师啦。
演员阵容方面，除咗黄子华，仲有谢君豪、林保怡、王敏德、王丹妮、廖子妤、何启华、杨偲泳、栢天男同谷德昭。
《毒舌大状》故事系讲一宗国际名模涉嫌虐待女儿嘅冤案，成为法律界、权贵与名媛之间嘅角力。权贵与名媛用尽权力与资源自保，另一方面大状喺重重困难下伸张正义。
黄子华表示，喺戏中佢有两个身份︰「我个角色之前系做法官，但因为做法官做得唔系好如意，无乜大案审，所以之后做番大状。」
至于点解会给黄子华做男主角？
导演吴炜伦就话：「只有黄子华系越闹人，观众越钟意睇，呢个系得天独厚，谂唔到第二个。」
黄子华就话︰「其实我好少闹人，喺《男亲女爱》入面都系俾人闹，呢套戏同时做法官同律师，闹人机会真系唔少，如果Miss Mo出现，我系有资格闹佢！」
咁电影有冇黄子华最擅长嘅搞笑元素？
黄子华就话︰「乜都有，乜都要斗，导演之前拍开《激战》、《寒战2》嗰啲，今次都有某种『战』系后面，所以成个剧情推进嘅迫力好大，剧力万钧，希望观众会睇到有好大嘅情绪起伏。」
讲到呢度，系时候介绍一下导演吴炜伦。
佢系好多部卖座港产片嘅编剧，包括有《杀破狼》、《证人》、《线人》、《激战》、《寒战2》以及而近期嘅《梅艳芳》。
而《寒战2》同《梅艳芳》，分别系香港票房一二。
吴炜伦担任编剧多年，今次除咗系编剧之外，仲系导演。
睇落，套戏真系好有睇头。
女主角王丹妮应该唔使多介绍，另一个女主角廖子妤，就系电影《梅艳芳》中饰演过梅爱芳。
由于王丹妮第一套戏就系《梅艳芳》，讲到点样摆脱饰演梅姐嘅影子，佢就话︰「一步一步嚟啦，始终系我第二套电影，自己要继续努力，希望可以有新嘅面貌带俾观众。」
相对于动作电影拳拳到肉、飞天遁地。
法庭电影自然静焗好多，好唔好睇，就要靠剧情嘅张力去推进。
不过有咁好嘅班底，又有子华神助阵，口舌为枪，对白为弹。
应该唔会输蚀，值得期待！
,
