（来源：《随身应急情景粤语》，只做学习分享，宣传家乡，不出于任何商业目的，特此鸣谢原作者辛勤付出，版权归原作者所有，如有侵权，我们立即删除）
粤语系广东人嘅日常用语，口头讲嘅粤语尚算标准，但系越来越多人书写粤语嘅时候为咗方便，而写同音字。如果写返正字嘅话，相信会考起唔少地道老广。今日就同大家讲几个粤语书写容易出错嘅词。
老世 & 老细
正确写法应该系“老世”。“老细”只系同读音嘅错误写法。
当年香港沦陷后,日军查户籍,翻译嚟到门前大叫:“世带主出来”，“世带主”指户主，亦系“老世”嘅起源。广府人钟意喺称呼前面加个“老”字,例如:老表、老兄等。又将“世带主”减字简称,加个“老”字,所以就有咗“老世”呢个词,后来流传落嚟就变成老板嘅俗称。
肆正 & 四正
正确写法应该系“四正”。“四”古音读【si3】，口语相传，所以“四正”嘅“四”沿用古音。“肆正”系错误写法，只系用咗同音字“肆”。
四正：指人的相貌端正，美观。
拼命三郎 & 拚命三郎
“拼”和“拚”喺广东话里面系两个唔同嘅意思。
拼：【ping1或ping3】，意思系“努力拼搏”。
拚：【pun2（盆）】，意思系“舍弃，不顾惜”。
普通话里面“拚”已经几乎被“拼”取代。《水浒传》里面，施耐庵笔下嘅石秀被称为“拚命三郎”，意思系话石秀唔怕死，而“拼命三郎”意思系好努力咁解。
洗钱 & 使钱
“洗钱”同“使钱”系两个完全唔同嘅概念。
洗钱：系“洗黑钱”嘅简称。
使钱：先系用钱嘅意思。
粤语里面表达“使用”嘅意思，只有“使”，所以“洗”同埋“驶”都系错误写法
禁用 & 襟用
呢一对比较有意思，“耐用”嘅地道粤语正确读法系“襟用”，但正确写法系“禁用”。
《国语辞典》里面，“禁”嘅意思系：副词，耐，指物品耐用嘅意思。
正确读法：禁【kam1（襟）】用
站乱歌柄 & 儳乱歌柄
正确写法应该系“儳乱歌柄”。
正确读法：儳【zaam6（站）】
《礼记▪曲礼上》有“长者不及，毋儳言。”意思即系长辈讲紧嘢，唔好随便插嘴。所以“儳言”就系“插嘴”嘅意思。
注：“儳乱歌柄”亦有写法为“劖乱歌柄”。
摔门 & 戍门
粤语里面，“锁门”系有【seot1（摔）】门嘅说法，正确写法为“戍【seot1】门”。
《国语辞典》里面有“屈戍”，即系用嚟开阖门窗嘅环纽。另外仲有“闩【saan1】门”同“【taap3（塔）】门”嘅讲法，三种都有锁门嘅意思，但三个词都有差别。
闩门：一般指关门。
戍门：指用门上的横锁（即门戍）卡住门框。
【taap3（塔）】门：指用外带的锁固定门环或门与门框。
