作为亚视为数不多嘅神剧，《我和僵尸有个约会》于1998年首播后，6年间一共拍咗3部。
剧集算得上系港剧僵尸题材嘅巅峰之作，而男女主角尹天照、万绮雯，饰演嘅「况天佑」及「马小玲」亦深入民心。
最近就有消息指《我和僵尸有个约会》会翻拍电影版，并且由《我和僵尸有个约会》编剧、万绮雯老公陈十三继续担任编剧，仲「升呢」做埋监制同导演。
电影版计划今年10月在香港开拍。不过，不过——
片名会改成《我和马小玲有个约会》。
系咪一时之间好难接受？
至于点解片名要改成「马小玲」？网上传得最似层层嘅就系因为，套戏同时会喺内地上映，而「僵尸」题材比较敏感，可能难于过审，所以唔会续用原名。
原本难得翻拍经典，都系件好事嘅，如果两大主角继续做主角嘅话。
不过唔系。
男主角「况天佑」一直盛传系黄宗泽，而女主角「马小玲」由原定薛凯琪，但因为倾唔掂，改为吴千语。
至于长腿万二蚊，好可能只系出山客串一下，撑下老公咁话。
唔好藐嘴先。
起码，吴千语都叫有大长腿。
起码，两代「马小玲」都有机会同场演出。
讲翻亚视经典，《我和僵尸有个约会》真系威水过。
《我和僵尸有个约会》于98年11月30日播映，由陈十三等人创作，尹天照、万绮雯、杨恭如、陈启泰、吴廷烨、张文慈等人所主演。
计翻都已经系24年前嘅事，如果你细个睇过，甚至吓亲过，而家都唔会再惊。
嗰个年代嚟讲，剧集故事的确好创新，大讲斩妖除魔，主线脉络清晰，比起而家啲港剧，真系高质好几倍。
特别系2015年TVB拍嘅题材相似嘅《僵》，嗰套，真系一言难尽。
当年《我和僵尸有个约会》首播时，同TVB台庆剧《烈火雄心》大结局对撼半小时，虽然剧集最终只得10点收视，但对亚视来讲，已经系唔错，又赢到口碑。
到咗2000年3月《我和僵尸有个约会2》播出后再次爆发，TVB即以《创世纪2天地有情》迎战，最终《我和僵尸有个约会2》结局当日获得最高收视22点，占该时段六成收视，打破咗TVB惯性收视定律，成为亚视经典作。
去到2004年播映《我和僵尸有个约会3》，由于故事难明，情节较前两部更天马行空，令观众较难接受，因此套剧声势已经大不如前两部。
而《我和僵尸有个约会》嘅亮点，最大亮点——
就系万绮雯每集都会着住短裙大show长腿，人气急升嘅佢，成为当时当之无愧嘅宅男女神。
另一个亮点就系「马小玲」每次出招驱魔时，都会讲嘅九字真言「临、兵、斗、者、皆、阵、列、在、前」以及做手印，亦令人印象深刻。
隔咗咁多年，再翻拍，仲要系电影版，好听就叫浓缩，唔好听就系缩水。
仲要男女主角都完全唔同晒，所谓打着「原班人马」旗号，可能变成打折扣。
再加上片名《我和马小玲有个约会》，骤眼睇，有啲不伦不类，搞笑剧嘅即视感。
而翻拍经典，通常都系难以超越前作之余，分分钟，仲会成为烂片。
唔使举太多例子，单单系《冲上云霄》电影版、《使徒行者》电影版就系前车之鉴。
呢两部改编港剧嘅港产片，票房同口碑都扑晒街。
希望《我和僵尸有个约会》电影版唔会炒车、唔会毁经典啦，虽然呢个机率都几细下。
,
