最近重睇咗部贺岁旧片，叫《呖咕呖咕新年财》，主演有刘德华、古天乐、梁咏琪等，大家又知唔知，咩系“呖咕呖咕”？
大概会有好多人误会，“呖咕呖咕”系广东麻雀用语。 “呖咕呖咕”其实唔系粤语，而系台湾麻雀嘅一种牌章，不同于广东麻雀一副牌13只，台湾牌系有16只，“呖咕呖咕”就系指7个对子同1个刻子。
下边我哋就嚟介绍下，广东人打麻雀经常会用到嘅术语，就算你系新手，都可以即刻伪装成高手。 （考虑到唔系每个人都识打麻雀，本文就唔涉及复杂嘅战术牌章）
花色
大家都唔陌生，广东麻雀分别将三大花色称为“万子”、“筒子”、“索子”，其中“索子”又会叫「竹仔」，“筒子”又会叫「银仔」。 东南西北中发白就会被称为“番子”，又名「番薯」，而春夏秋冬、梅兰菊竹八只花牌就会叫“花子”，喺唔同玩法中，花子起唔同作用。 麻雀代号除咗花色叫法与别不同，广东人都非常中意帮唔同嘅牌起花名，各个圈子叫法不一，下面列举比较常见嘅花名。
粤语之中，白白净净会令人联想起青靓白净嘅靓仔，比如茶餐厅大牌档会叫白饭做靓仔，所以都有人会将白板叫成“靓仔”。
打牌用语 打牌首先洗牌、砌牌，然后打骰起庄（用骰仔选择摸牌嘅起位），执骨（执返啲骰仔），按照起位各自攞牌，跳牌（做庄嘅最后要摸两只牌，两只牌要隔开）。
攞好牌之后，就开始开牌、理牌，庄家开始先打牌，牌一出，就见光死（打出嘅牌唔准收翻），落地生根冇回头。 期间有啲雀精打牌高张（打牌好嘅高手），运筹帷幄，又有新雀仔打牌差，破坏规矩被人罚张（罚人停摸一次牌），最衰嘅都系种番薯（又叫养番仔，有心留着啲番子牌），令你冇办法碰番子。
打到后来，可能你差张就可以叫糊（再摸多只有用嘅牌先可以叫糊），呢个时候一定要小心，唔好出铳（打出只牌畀人食餬），同时唔好太兴奋，搞到自己最后食诈糊，一家包三家。
如果自己做庄自己食糊，就可以冧庄（继续做庄），如果其余三家食糊，就只有过庄（自己嘅庄位要转到下家）。 想要轻松食糊，就要记得宁叫卡窿，莫叫对碰（对碰食糊几率低），上碰下自摸（上家一碰，下家有机会多攞牌，易食糊），同埋有时候第一铺食糊未必好，可能被人咒食头糊，输甩裤。
就算开始输到咗都唔紧要，因为西风起糊，恶过老虎（西风圈开始发威食糊，表示好戏在后头）。 甩牌 除咗常见嘅洗牌、砌牌、开牌、要牌等，广东人打麻雀会经常讲嘅一句话就系： “等我甩下只牌先！” 一般打麻雀摸牌系咁，自己睇牌自己知！
而「甩牌」系指唔睇牌，直接用手指感受牌面，以此估出自己攞嘅系咩牌。
要「甩牌」甩得啱，需要长年累月同麻雀接触，老雀精甩牌除咗令你提前知道张牌系咩，同时都系展现自己牌技，串死啲新手嘅大好机会。 最憎遇到边啲人？ 站长：每次谂嘢谂好耐，唔出牌嘅人。 猪大嫂：（诛）大嫂，令下家唔可以上牌嘅人。
收藏家：收收埋埋人哋要嘅牌嘅人。 打龙通：两个或几个人合谋通水。 大魔王：成日自摸嘅人
希望大家打麻雀都唔好遇到上边啲人，更加唔好遇到三缺一，惨过乞（三缺一凑唔成一台麻雀嘅痛苦）！
**记住，我哋系坚决推广卫生麻雀！！！ 各位自己友， 你哋屋企打麻雀有咩特殊用语？ 你又知唔知自摸西嘅含义？ （秒懂嘅仲唔留言！）
素材出自广东话资料馆等 羊城网负责整理编辑
,
