网红店食得多
间唔中都想去扫下D小食
可乐君成日见到D人话
XX老字号D嘢几咁好食
唔食走宝之类嘅嘢
唔好讲笑啦
食老字号都会中招
食老字号嘅分店
可能更加容易濑嘢
今期可乐君以身试毒帮大家扫雷
☟
芬芳甜品(体育东横街店)
地址：天河区体育东横街6号之四
营业时间：周一至周日 07:00-20:30
人均：19元
有网友话，呢间店从体育东市场搬到呢个位置后，价格有所上升。不过可乐君睇过觉得，喺CBD，能够廿蚊楼下就食到OK嘅碟头饭，算係咁啦。所以呢间店饭点嘅人气都好劲，坐到满晒！
一场嚟到唔通食碟头饭咩，梗係食甜品啦！可乐君见佢有新品打算试下。well，啱啱天黑，椰香紫米燕麦露就话卖晒，唯有试下冇椰香嘅紫米燕麦西米露。阿姨问你要冻要热？夏天梗係拣冻噶啦！
紫米燕麦西米露
价格：11元
推荐指数：★★★
啱啱上嘅时候仲以为阿姨俾错，因为成个外表就好似一碗普通嘅西米露咁。然后实践证明，D紫米同燕麦原来喺晒底部！
食落去“刚柔并重”，紫米燕麦西米每一样食材都有唔同嘅口感，如果可以加埋椰汁就好啦！
芬芳甜品(同福路店)
地址： 海珠区同福东路619号
营业时间：周一至周日 06:30-23:00
人均：21元
几乎连续开足几个档口咁把炮，生意肯定唔差啦！晚餐后好多嚟食甜品嘅人。不过唔够冷气，始终觉得有D焗。
唔止卖甜品，仲有好多经典小食，雪柜都有糕点同甜品出售。不过D嘢摆喺度唔G摆咗几耐......
百合莲子红豆沙
价格：10元
推荐指数：★
冷热任选，不过冻嘅都唔觉得好冻。係就係真材实料，不过味道好淡，口感非常一般。
庄臣美食坊
地址：越秀区惠福东路610号
营业时间：暂无
人均：48元
一间汇集老广小食嘅店，吃货当然要打卡！先付后食，楼下同楼上都有位坐，埋完单自己揾位，阿姨一阵就会将美食送到面前。可乐君今次嚟试呢度嘅陈添记鱼皮同八珍饺子掂唔掂！
陈添记鱼皮
价格：27元
推荐指数：★★★
即点即捞，鱼皮都係咁爽口，但调味就超咸，下次要食记住求姨姨手下留情！味道淡，仲可以加豉油，咸嘅话，就冇得救......
另外，对于食到鱼鳞呢件事，可乐君已经见惯不怪，因为喺宝华路间老店，你都会成日食到鱼鳞。
八珍煎饺
价格：18元
推荐指数：★★
一份6只，韭菜饺，睇个样就中规中矩，食落又係点？
emmm，饺子皮比较厚，里边D馅唔多。而且，点解都係咁咸？迎合重口味嘅食客？调味有待改进wor！
八珍
地址： 北京路213-215号
营业时间：周一至周日 09:00-21:00
人均：16元
人少嘅时候都唔会太热，坐门口风闸位最爽你信唔信？
价格就贴地好多，韭菜鲜肉饺15蚊有10只，相隔一条街D物价水平都唔同D啊！早前试过韭黄水饺係几丰满大只嘅，而且新鲜滚热辣，值得再食。
猪红汤
价格：7元
推荐指数：★★
热辣辣一碗，D汤胡椒味比较重，猪红唔会太易碎，但冇咩猪红嘅味道，整体口感同味道一般。行过路过试下无妨，特登嚟食就费事啦！
陈添记(十五甫三巷店)
地址：荔湾区宝华路十五甫三巷内进第二档
营业时间：周一至周日 09:00-22:30
人均：23元
几时都咁多人，不过平日就好D，人多但依然会有位坐，饭点就难讲。老店依然係卖3样嘢，老广都心照係边3样：祖传爽鱼皮、传统艇仔粥、豉油王蒸肠粉。
祖传爽鱼皮
价格：25元
推荐指数：★★★★
味道始终係老店做得比较稳定，适中一D唔会俾豉油抢晒D味，不过一定要捞匀先好食wor。价格都比惠福东平少少，就係环境比较“怀旧”。夏天加一支“肥宅快乐水”叹鱼皮都唔错！
btw，隔离十五甫正街4号之三呢间店，係佢哋嘅分店。
不过呢边就更多美食选择咁解！
kid午潼
地址： 越秀区西湖路龙藏街刘家巷2号103
营业时间：周二至周日 11:00-23:00
人均：31元
佢哋同成裕雪糕店合作，所以大家唔使去荔枝湾，都可以喺度食到脆皮雪糕！
手卷脆皮蛋筒雪糕(双球)
价格：16元
推荐指数：★★★★
蛋筒确实脆皮，雪糕用阿波罗雪糕，双球嘅size都够大，可惜雪糕食落有DD结霜啊！但喺咁清凉嘅环境下叹雪糕，感觉都好正！
成裕雪糕店
地址：荔湾区龙津西路162号
营业时间：周一至周日 07:30-20:30
人均：10元
15蚊三球，价格贴地到冇朋友！行过路过，必定童心爆炸冲去买雪糕！呢度嘅薄饼夹雪糕都唔错，新鲜热辣出炉！
香脆蛋筒雪糕(单球)
价格：5元
推荐指数：★★★★
天气太热，加上个雪糕筒都係热嘅，雪糕就融得超快！单球个蛋筒好细，雪糕球都好细，下次可乐君都係买3球啦，单球唔够食啊！
达扬原味炖品(文明路店)
地址：越秀区文明路160-1号
营业时间：周一至周日 12:00-24:00
人均：18元
同好多“排队店”一样，其实都会有空荡荡冇人嘅时候，假如遇啱呢D时候嚟食就好啦，唔使排队又无需同其他人逼。十几蚊就有交易，因为品质就摆喺度，所以就算佢稍微升价，fans都心甘命抵埋单。
老店冇位坐嘅时候，可以兜入后巷，佢哋有个档口俾人食嘢。唔係好远，问下店内嘅阿叔或者哥哥仔佢哋会讲你知位置。
达扬原味炖品(德政中路店)
地址：越秀区德政中路304号首层
营业时间：周一至周日 11:00-23:30
人均：19元
呢间环境稍微好坐D，墙边嘅座位仲有得充电真係好贴心。总店同老店相隔唔远，出品都一样好稳定，所以钟意去边间都无所谓。
原只椰子炖竹丝鸡
价格：19元
推荐指数：★★★★★
一如既往足料，汤水炖得好清，能够饮到椰子水嘅清甜，味道啱啱好，唔会盖过食材本身嘅味道！为椰子鸡疯狂打call！
虽然外表睇唔出，但椰壳里面真係放咗好多鸡肉，口感比较嫩，部分如鸡胸就例外啦！
虽然老字号好出名
但实际上都有好多雷区
你有冇试过踩雷？
,
