早两日，一个叫“张先生”嘅人写咗篇叫《北京，有2000万人假装在生活》嘅文章，刷爆咗朋友圈，虽然系典型嘅「煽动人心矫情套路文」，但系确实引发唔少“外漂人”内心嘅波动...
两个钟之后，一大堆回击、讽刺嘅文章铺天盖地咁出现喺朋友圈，虽然大家都用唔同嘅角度、唔同嘅观点回击，但系中心思想只有一个：
“张先生”喺北京留唔留到落去，我唔知。但系作为一个热情嘅广州人，真系好想问问呢位“张先生”，点解唔嚟广州？
为咗表达我嘅热情，我仲专门为“张先生”以及想嚟广州发展嘅外省人，制作咗一份「广州生活指南」！包你哋可以迅速了解广州人！
事不宜迟，即刻开波！
如果上网查，肯定系“广州人朴素包容”、“广州人十分友好”之类嘅官方答案...
废话就唔讲了，我净系知道喺广州，无论你系中国人定外国人、生得好睇定大众面、白人黑人定黄种人，喺广州街头都一定会畀人叫“靓仔、靓女”！（唔排除有少数广州人对外地人唔太友好）
系！咁又点？
去茶楼饮茶，隔离坐住一个猥琐大叔，好可能就系“手揸几本房产证”嘅千万富翁，但系，咁又点？
广州人嘅反应，只有三个字：咁又点！
阿妈：“咁佢有冇仔啊？同你相睇下啦...冇仔啊？有钱咁又点啊！”
朋友：“咁佢系唔系畀钱你使啊...唔识嘎？有钱咁又点啊！”
同事：“个千万富翁系唔系想畀生意我哋做先...唔系？富翁咁又点啊！”
睇起身，广州人貌似势利又市侩，不过，呢个反映咗广州人嘅精神，无论对咩人都一视同仁。无论你月入20万定系月入2千，你都只不过系广州嘅一份子。
广州人由细睇珠江台、TVB大，部分人嘅普通话确实唔系几好，甚至有少部分广州人连普通话都唔识听。
大多数广州人面对讲普通话嘅外地人，都会好礼貌咁转讲普通话，虽然普通话唔准，但系都会花光全身力气令外地人理解。
曾经听人讲过，「广州有钱人好少会借钱帮亲戚」。
如果咁样叫冷漠嘅话，咁大部分广州人确实好冷漠！唔止咁，广州人就算借钱畀亲戚，都会写张借条！
因为系广州人眼中，“数还数、路还路”，兄弟借钱要记落数簿，朋友食饭都要分开计数（AA制）！
（图片来源于网络）
广州人见到外国人会讲“hello”，见到外省人会讲“你好”，见到自己人会讲“食咗饭未”。
当然，嗌交都会爆粗，都会问候「令寿堂」，全国人民都系咁，人之常情，何来冇礼貌呢？
广州人对任何人都一样，你对佢笑一笑，佢都会对你点一点头。以礼相待，自然以礼相报，唔会多一分，更加误会少一寸！
对于“广漂”嘅兄弟姐妹，广州人有一个禁忌一定要记住！有啲嘢打死都唔好喺广州人面前讲！
广州人唔在意畀人闹“炒花蟹”、都唔怕畀人“烧数簿”，但若然你喺广州人面前“闹广州”，恭喜你，你即将可以见识到「广州人嘅怒火」 「最传统嘅粤语粗口」，甚至你仲可以见识到纯正嘅「岭南拳术」。
所以，“张先生”你都系唔适合嚟广州了...
